Президент Администрацияси раҳбари Саида Мирзиёева Самарқандда бўлажак Болалар кутубхонаси концепцияси билан танишди.
Янги кутубхона 1911 йилда қурилган тарихий бинода жойлашади.
"Бу бино худди Тошкент кутубхонаси каби маданий мерос ва давр руҳини сақлаган ҳолда эҳтиёткорлик билан таъмирланади," - деди Саида Мирзиёева.
Реставрация ишлари архитектура, интерьер ва декоратив деталларнинг асл элементларини тиклашга қаратилади. Унинг ичида хавфсизлик талабларига жавоб берадиган, болалар ва катталар учун қулай бўлган инфратузилма яратилади.
Кутубхона болалар, ўсмирлар, уларнинг ота-оналари ва педагоглар учун ижодий маконга айланади.
Жумладан, ўқув заллари, мустақил ва гуруҳ бўлиб ишлаш, маърузалар, ижодий учрашувлар, маърифий ва маданий-маърифий тадбирлар ўтказиш учун ҳудудлар ташкил этиш режалаштирилган.
Инклюзивликка алоҳида эътибор қаратилади. Бу орқали кўзи ожиз ва заиф кўрувчи болалар учун аудио фонд яратилади.
Қайд этилишича, кутубхона фонди ўзбек, инглиз ва рус тилларида 120 минг жилдни ташкил этади.
Фонд тузилмаси китобхонларнинг турли ёш тоифалари, тайёргарлик даражалари ва қизиқишларига йўналтирилган бўлимларни, шунингдек, тарих, маданият, санъат, аниқ ва табиий фанлар бўйича ихтисослаштирилган тўпламларни ўз ичига олади.
Келажакда электрон каталогни ривожлантириш, материалларнинг бир қисмига онлайн форматда кириш имконини берувчи рақамли хизматларни жорий этиш мумкин.
"Бу Самарқанд аҳолиси учун ақл бовар қилмайдиган, маънавиятга бой жой бўлади. Ушбу ажойиб лойиҳага омад тилайман!" - деб ёзади Саида Мирзиёева.
Изоҳ