Жиззах вилоятида қуввати 2 ГВт бўлган катта атом электр станцияси ва 110 МВт бўлган кичик атом электр станцияси қурилиши режалаштирилган. Бу ҳақда Ўзбекистон бош вазири ўринбосари Жамшид Хўжаев пайшанба куни Москвада бўлиб ўтган Глобал атом форуми йиғилишида маълум қилди.
Лойиҳа Россиянинг "Росатом" давлат корпорацияси билан ҳамкорликда амалга оширилади. Жиззах вилоятидаги битта майдонда 1 минг мегаваттли иккита катта қувватли ва 55 мегаваттли иккита кичик қувватли реакторлар қурилади. Бундай комбинацияланган ёндашув бир вақтнинг ўзида 2,1 гигаватт асосий генерация ва мослашувчан ўзгарувчан қувватларни беради.
Қайд этилишича, қарийб 525 гектар майдонда жойлашадиган станция 2035 йилга бориб йилига 15 миллиард киловатт-соатдан ортиқ электр энергияси ишлаб чиқаради. Яқин келажакда Ўзбекистонда тоза энергия улуши 40 фоиздан ошиши режалаштирилган ва атом электр станцияси бу мақсадга эришишда салмоқли ҳисса қўшади.
"Ўзатом" агентлиги директори Азим Ахмедхаджаевнинг сўзларига кўра, Жиззах вилоятидаги кичик қувватли атом электр станцияси қурилиш майдонида ер қазиш ишлари бошланган, барча тадқиқот ишлари якунланган. Лойиҳа хавфсизлик бўйича барча халқаро талаблар ва стандартларга жавоб бериши учун МАГАТЕ билан ҳамкорлик қилинмоқда.
"Атом соҳаси келажакни белгилайди ва Ўзбекистон учун бу мавзу айниқса долзарбдир. Мамлакатимизни ривожлантиришнинг кенг кўламли саноат технологик дастурини ҳисобга олган ҳолда, биз ўз аҳамиятига кўра энг йирик технологик ютуқ бўлган воқеалар арафасида турибмиз. Кичик модулли реакторларни жорий этишнинг кашшофи сифатида Ўзбекистон тажриба алмашиш ва кадрлар тайёрлаш майдонига айланиши мумкин," - деди у.
Форумда экспертлар, шунингдек, амалга оширилаётган ривожланиш моделини ҳисобга олган ҳолда турли давлатлар қандай технологик танловни амалга ошираётганини муҳокама қилдилар. Ресурслар, иқлим ва инфратузилма, географик ва иқтисодий воқеликни ҳисобга олган ҳолда мукаммал энергомиксни қандай қуриш бўйича ўз қарашлари билан ўртоқлашди.
Изоҳ