Пайариқ тумани Ички ишлар бўлими ходимлари томонидан олинган маълумотга кўра, 1983-йилда туғилган, муқаддам беш маротаба ЖКнинг 112, 277, 109 ва 219-моддалари билан судланган фуқаро Ж.А. ўзининг жиноий шериги, 1996 йилда туғилган, муқаддам ЖКнинг 169-моддаси билан судланган фуқаро Б.О. билан биргаликда жиноий йўл билан моддий даромад орттириш мақсадида тадбиркорларга турли туҳматлар уюштириб, уларга руҳий ва жисмоний тазйиқ ўтказиб келаётганлиги тўғрисида тезкор маълумотлар олинган.
Олиб борилган тезкор суриштирув ишлари давомида, Ж.А. ўзига тегишли масъулияти чекланган жамияти биносида офис қилиб олиб, туманда яшовчи фуқароларни турли туҳматлар билан ушбу офисга олиб келиб, уларни яланғочлаб, уриб-дўппослаб, ушбу ҳолатини видеотасвирга олганлиги ва ушбу видеотасвирларни турли ижтимоий тармоқларга тарқатиб юбориш билан таҳдид қилиб, жабрланувчилардан пул ёки бошқа моддий қийматликларни қўлга киритиб келганлиги аниқланди.
Ўтказилган тезкор тадбирлар давомида қўлга олинган фуқаро Б.О.нинг ёни кўздан кечирилганда, унинг ёнида оғирлиги уч граммга яқин бўлган гиёҳвандлик воситаси борлиги аниқланиб, ҳужжатлаштириб олинди.
Шунингдек, унга тегишли бўлган телефон аппарати холислар иштирокида кўздан кечирилганда, телефон хотирасида Ж.А. ва Б.О. томонидан фуқароларни занжирлар билан уриб, таҳқирлаган ҳолати ёзиб олинган видеотасвир мавжуд эканлиги аниқланди.
Шундан сўнг, тезкор тадбир давом эттирилиб, Ж.А. ҳам қўлга олинди. Унинг офиси кўздан кечирилганда, бу ерда фуқароларни қийнаш учун сақлаб келинган металл занжир ва бошқа воситалар мавжудлиги ҳам аниқланиб, далилий ашё тариқасида олинди.
Ҳолат юзасидан Паяриқ тумани Ички ишлар бўлими ҳузуридаги тергов бўлими томонидан Жиноят кодексининг 112, 276 ҳамда 277-моддалари билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ