Давлат раҳбари душанба куни бўлиб ўтган йиғилишда маълум қилганидек, шаффоф тадбиркорлик муҳитини янада шакллантириш ва нақд пулсиз ҳисоб-китоблар учун имкониятларни кенгайтириш мақсадида бир қатор янги чора-тадбирлар назарда тутилмоқда.
Хусусан, 2026 йил 1 январдан йиллик айланмаси 1 миллиард сўмгача бўлган якка тартибдаги тадбиркорлар ва ўзини ўзи банд қилган фуқаролар учун айланмадан олинадиган солиқ ставкаси 1 фоиз миқдорида белгиланади.
Шу билан бирга, якка тартибдаги тадбиркорлар ва ўзини ўзи банд қилган фуқаролар учун 2030 йил 31 декабрга қадар алоҳида ҳуқуқий режим жорий этилади.
Давлат рўйхатидан ўтказишдан тортиб ҳисобот топширишгача бўлган барча асосий хизматларни бирлаштирувчи интеграциялашган рақамли платформани яратиш режалаштирилган. Ушбу платформа орқали фаолиятни расмийлаштириш, банк ҳисобварақларини очиш ва бошқариш, солиқларни ҳисоблаш ва тўлаш, ҳисоб-китобларни амалга ошириш ва фискал чекларни шакллантириш мумкин бўлади.
Ушбу тизим доирасида тадбиркорлар даромадларни қабул қилиш, ходимлар, контрагентлар ва ташкилотлар билан ҳисоб-китоб қилиш, шунингдек, солиқлар ва бошқа мажбурий тўловларни тўлаш имконини берувчи электрон ҳамён очишлари мумкин бўлади. Электрон ҳамёнга эга бўлган якка тартибдаги тадбиркорлар ва ўзини ўзи банд қилган шахслар учун банк ҳисобварақларини очиш мажбурий бўлмайди.
2025 йил 1 ноябрдан бошлаб ушбу жараёнларда QR-кодлар ва "tap to pay" технологияси қўлланила бошлайди. Ҳужжатларни электрон калитсиз - масофавий биометрия ва SMS-хабарномалардан фойдаланган ҳолда имзолаш мумкин бўлади. Бу маълумотлар қоғоздаги ҳужжатларга тенглаштирилади. Ходимлар билан ҳисоб-китобларни электрон ҳамён орқали амалга ошириш имконини берувчи кунлик тўловлар тартиби синов тариқасида жорий этилмоқда.
Якка тартибдаги тадбиркорлар ва ўзини ўзи банд қилган шахсларда электрон тўловларни қабул қилиш учун махсус QR-коднинг мавжудлиги чакана савдо қоидаларининг мажбурий талабига айланади. Рақамли платформадаги пул оқимлари тўғрисидаги маълумотлар кредит ажратиш тўғрисида қарор қабул қилишда ҳисобга олинади.
Президент билдирилган таклифларни маъқуллаб, якка тартибдаги тадбиркорлар ва ўзини ўзи банд қилган шахслар фаолияти учун қулай шарт-шароитлар яратиш чора-тадбирлари тўғрисидаги қарорни имзолади.
Изоҳ