24 июль куни тахминан соат 11:00да уч нафар ишчи янги қурилаётган кўп қаватли уйларнинг канализация қувурларини шаҳарнинг асосий канализация тизимига улаш ишларини олиб борган. Бу ҳақда ИИВ ҳузуридаги тергов департаменти хабар бермоқда.
47 ёшли А.К. ва 45 ёшли С.Б. қувурларни монтаж қилиш жараёнида канализациядан чиқаётган газлардан заҳарланиб, ҳушидан кетишган. Яна бир ишчи 27 ёшли З.Ш. уларга ёрдам бериш учун канализация қувурига тушган ва у ҳам газдан заҳарланиб ҳушидан кетган.
Бундан ташқари, уларнинг яна бир шериги 41 ёшли С.А. уларга ёрдам бериш мақсадида ушбу қувурга тушиб, заҳарланишдан ҳушидан кетган.
Қайд этилишича, атрофда тўпланган аҳоли фақатгина С.А.ни қутқариб қолишган, қолган уч нафар ишчи эса ҳодиса жойида канализациядан чиқаётган газлардан заҳарланиб вафот этган.
Ҳодиса жойига тергов гуруҳи чиқиб, воқеа жойини кўздан кечириб, тергов олди суриштирув ҳаракатларини олиб бормоқда.
