Кеча, 12 авгуси куни Ўзбекистон Республикаси Президенти Шавкат Мирзиёев раислигида ўтказилган видеоселектор йиғилишида 15 августдан карантин талабларини босқичма-босқич юмшатиш бўйича берилган топшириқлар доирасида Тошкент вилояти Бўстонлиқ туманидаги Чорвоқ сув омборида аҳолига чўмилиш ва кўнгилочар воситалар борасида барча чекловлар ечилиб, улардан фойдаланишга рухсат берилди.
Бу ҳақда Ўзбекистон Республикаси Бош вазир ўринбосари – Республика махсус комиссияси аъзоси – Туризмни ривожлантириш давлат қўмитаси раиси Азиз Абдуҳакимов маълум қилган.
Эслатиб ўтамиз, аввалроқ 2020 йил 1 августдан бошлаб Тошкент вилоятининг Бўстонлиқ туманида жойлашган “Чорвоқ” сув омборида аҳолининг чўмилишини қатъиян тақиқлашни назарда тутувчи Ҳукумат қарори лойиҳаси муҳокамага қўйилган эди.
