Amazon асосчиси Жефф Безоснинг бойлиги янги рекордни ўрнатди. 25 август куни кечки савдолар вақтида Безоснинг бойлиги 200 млрд доллардан ошган. Бу ҳақда миллиардерларнинг бойлигини реал вақтда кузатиб борадиган Forbes Real-Time хабар берди.
Бироқ у янги рекордни узоқ муддат сақлаб қололмаган. 25 август кунги савдолар якунига бориб унинг бойлиги $199,7 миллиардни ташкил қилган.
Amazon асосчиси компаниянинг 11,1 фоиз акцияларига эгалик қилади. Пандемия бошланганидан кейин компаниянинг қимматли қоғозлари нақ 55 фоизга ўсган. Безоснинг бойлиги эса сўнгги бир йил ичида $86 миллиардга ошган.
Миллиардер бундай рекордни аввалроқ ўрнатиши мумкин эди. Бироқ у ўтган йили хотини Маккензи Скотт билан ажрашганидан кейин унга компаниянинг 4 фоиз акциясини беришга мажбур бўлган. Ҳозирда Скоттнинг бойлиги $63,4 миллиардга баҳоланган ва миллиардерлар рўйхатида 14-ўринда бормоқда.
