Аввалроқ, ижтимоий тармоқларда фуқаро ИИО ходимига қаршилик кўрсатаётганлиги акс этган видео тарқалиб, турли муҳокамаларга сабаб бўлган эди. Мазкур ҳолат юзасидан пойтахт ИИББ Ахборот хизмати расмий муносабат билдирди.
Маълум қилинишича, ушбу ҳолат жорий йилнинг 21 июнь куни соат 14.30 атрофида Учтепа туманидаги 31-мавзе ҳудудида содир бўлган. Унда икки нафар фуқаро тортишиб қолган ва томонлар ўзаро жанжаллашиб кетган. Жанжал вақтида фуқаро У.М. ўткир тиғли жисм билан фуқаро Н.Т. га тан жароҳати етказган ҳамда ҳодиса жойидан яширинган. Натижада жабрланувчи "чап кўкрак қисмининг санчилган-кесилган жароҳати" ташхиси билан шифохонага жойлаштирилган.
Ҳодиса жойига етиб келган ҳудудий профилактика инспектори О.А. мазкур жиноятни содир этган шахсни тезликда топиб, уни ушлаш чораларини кўрган. Шу вақтда У.М. унга ҳам пичоқ билан тажовуз қилиб, фаол қаршилик кўрсатган. Кўрилган чора-тадбирлар натижасида гумонланувчи далилий ашё (Н.Т. га тан жароҳати етказган пичоқ) билан профилактика инспектори ва ППХ ходимлари томонидан қўлга олинган ҳамда терговга жалб қилинган.
Аниқланишича, ИИО ходимлари тан жароҳати олмаган.
Мазкур ҳолат юзасидан Учтепа тумани ИИО ФМБ ҳузуридаги Тергов бўлими томонидан ЖКнинг 105-моддаси 2-қисми "м" банди ("қасддан баданга ўртача оғир шикаст етказиш қуролни ёки совуқ қурол сифатида фойдаланилиши мумкин бўлган ашёларни ишлатиб содир этилган бўлса") билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ