Ўзбекистон ва Хитой ўртасидаги рейслар сони ҳафтасига 100 тага етказилади (ҳар бир мамлакатдаги авиакомпаниялар учун 50 та рейс), дея хабар қилди Транспорт вазирлиги.
Бу Пекинда Ўзбекистон Транспорт вазирлиги делегацияси ва Хитой авиация маъмурияти ўртасидаги музокаралар якунлари бўйича тайёрланган келишув баённомасида назарда тутилган.
Ҳужжатда парвозлар географиясини кенгайтириш, Ўзбекистон ва Хитой авиакомпанияларига икки давлатнинг исталган шаҳрига парвоз қилиш имкониятини яратиш ҳам кўзда тутилган (ҳозирда 7 та шаҳар парвозлар учун ажратилган).
Бундан ташқари, ўз хизматларини кўрсатадиган авиакомпаниялар сонига чекловлар олиб ташланди (ҳозирда улар фақат учта).
Битим жорий йилнинг апрел ойида икки давлат авиация маъмуриятининг қўшимча йиғилишидан сўнг, мамлакат қонунчилигига мувофиқ Хитойнинг ички тартиб-қоидалари тугаганидан кейин кучга киради.
