Росавиации маълумотларига кўра, 20 январь, шанба куни кечқурун Falcon 10 самолёти Aфғонистон ҳаво ҳудудида (Тожикистон чегараси яқинида) алоқани тўхтатиб, ва радар сигналларидан ғойиб бўлган. Дастлабки маълумотларга кўра, самолёт бортида 6 киши — тўрт нафар экипаж аъзоси ва икки йўловчи бўлган.
Самолёт Гая (Ҳиндистон) – Тошкент (Ўзбекистон) – Жуковский (Россия) йўналиши бўйича чартер тез ёрдам рейсини амалга ошираётган бўлган. Ҳозирда самолётни қидириш ишлари олиб борилмоқда.
Aamaj News хабарига кўра, самолёт Aфғонистон шимоли-шарқида, Бадахшон вилоятида қулаган.
Falcon 10 1978 йилда Франциянинг Dassault Aviation компанияси томонидан ишлаб чиқарилган. Самолёт "Атлетик Групп" МЧЖ ва хусусий шахсга тегишли.
