Тошкент шаҳар ИИББнинг маълумотларига кўра, жорий йилнинг июль ойида Мирзо-Улуғбек туманида 62 ёшли Н.С., 46 ёшли З.И. ва 46 ёшли Д.А.лар 34 ёшли Г.А.га унинг оиласини АҚШга жўнатишда ёрдам беришни ваъда қилишган. Бунинг учун аёллар жабрланувчидан 16 490 АҚШ доллари олишган. Аммо, улар ўз ваъдаларини бажармай, пулларни ўз эҳтиёжлари учун ишлатиб юборишган.
Ушбу шахсларга нисбатан Ўзбекистон Республикаси Жиноят кодексининг 168-моддаси (“Фирибгарлик”) бўйича жиноий иш қўзғатилган.
Тергов давомида аниқланишича, 2018 йилнинг май ойидан жорий йилнинг апрель ойига қадар юқорида айтиб ўтилган аёллар 37 ёшли Л.А.га ҳам унинг оиласини АҚШга жўнатишни ваъда қилишган. Л.А. уларга жами 17 420 АҚШ доллари берган. Аммо аёллар бу сафар ҳам ваъдаларида турмасдан, пулларни ўз эҳтиёжларига сарфлаб юборишган.
Айбланувчиларга Ўзбекистон Республикаси Жиноят кодексининг 168-моддаси (“Фирибгарлик“) бўйича қўшимча айблов юкланган.
