Бош прокуратура хабарига кўра, прокуратура 4 апрелда коронавирус кенг тарқалишининг олдини олиш, тегишли хизматларга мазкур касалликка чалинган беморлар билан алоқада бўлган шахсларни тезкор равишда аниқлаш ва уларнинг бошқа фуқаролар билан мулоқотини чеклаш бўйича кўмаклашиш чораларини белгилади.
Жумладан, Бош прокуратурада коронавирус инфекциясига чалинган беморлар билан мулоқотда бўлган шахслар доирасини аниқлаш бўйича идоралараро штаб, ҳудудларда эса, идоралараро ишчи гуруҳлар тузилди.
Шу сабабли, Бош прокуратура фуқароларни кундалик тутиб, унга ким билан ва қачон мулоқотда бўлганларини ёзиб боришга чақирган.
"Ҳар бир фуқаро қачон, ким билан, қаерда ва қай тарзда мулоқот қилганини ёзиб бориши мақсадга мувофиқ. Бу маълумотлар, аввало, касалликнинг олдини олиш, унинг тарқалишига чек қўйиш, пировардида минглаб одамларнинг ҳаётини сақлаб қолишга хизмат қилади", — дейилади хабарда.
