Ўзбекистонда кўчмас мулк бозоридаги фаоллик йилнинг биринчи чораги охирида кузатилган жадал ўсишдан сўнг иккинчи чоракда нисбатан барқарорлашди. Бу ҳақда Ўзбекистон Марказий банкининг шарҳида маълум қилинди.
Апрель–июнь ойларида кўчмас мулк олди-сотдиси бўйича 74,4 мингта битим расмийлаштирилган. Бу ўтган йилнинг шу давридаги кўрсаткичга деярли мос бўлиб, ўсиш 0,1 фоизни ташкил этган.
Иккинчи чоракда кўчмас мулк нархлари ўсишда давом этган. Бироқ нархларнинг ўсиш суръати иқтисодий фаоллик ва аҳоли даромадлари динамикасига нисбатан мўътадил бўлган.
Июнь ойида кўп қаватли уйлардаги бирламчи бозорда квартиралар нархи йиллик ҳисобда сўмда 6,2 фоизга, долларда эса 12 фоизга ошган. Иккиламчи бозорда ҳам шунга ўхшаш динамика кузатилиб, нархлар сўмда 6,3 фоизга, долларда 12,2 фоизга кўтарилган.
Марказий банк ҳисоботида таъкидланишича, бирламчи ва иккиламчи бозорларда нархларнинг деярли бир хил суръатда ўзгариши уй-жойга бўлган талабнинг барқарор шаклланаётганини кўрсатади. Шу билан бирга, ҳудудларда нархлар Тошкентга нисбатан тезроқ ўсган. Бу ҳудудлардаги нархларнинг нисбатан паст базаси, аҳоли даромадларининг ошиши, шунингдек, қурилиш ва инвестиция фаоллигининг кенгайиши билан изоҳланган.
Тошкентда эса иккинчи чоракда ер участкалари нархининг йиллик ҳисобда пасайиши давом этган. Июнь ойида 100 квадрат метр ер майдонининг ўртача таклиф нархи 292 млн сўм атрофида бўлиб, бу ўтган йилнинг июнь ойига нисбатан 9 фоизга паст.
Комментарии