28 сентябрь куни қабул қилинган қонун билан қурилиш соҳасида давлат назорати ва бошқарувини такомиллаштиришга қаратилган қатор ўзгартиш ва қўшимчалар киритилди.
Жумладан, «Лицензиялаш, рухсат бериш ва хабар бериш тартиб-таомиллари тўғрисида»ги қонунга киритилган ўзгартишларга кўра, қурилиш-монтаж ишларини бошлаш учун қурилиш ва уй-жой коммунал хўжалиги соҳасида назорат қилувчи ҳудудий инспекциялардан рухсат олиш талаб этилади.
Жиноят кодексига киритилган ўзгартишларга мувофиқ, тегишли рухсатсиз кўп қаватли уй-жой қуриш учун жиноий жавобгарлик белгиланди. Агар бундай қилмиш учун шахс аввал маъмурий жавобгарликка тортилган бўлса, қоидабузарлик такроран содир этилганда 3 йилдан 5 йилгача озодликдан маҳрум қилиш жазоси қўлланади.
Шунингдек, шаҳарсозлик тўғрисидаги қонунчиликни бузиш оқибатида инсон вафот этса ёки бошқа оғир оқибатлар келиб чиқса, 5 йилдан 7 йилгача озодликдан маҳрум қилиш жазоси белгиланди.
Қонун уч ойдан сўнг кучга киради.
Комментарии