Сингапурда аҳолини ҳар куни камида 15 дақиқа китоб ўқишга рағбатлантириш учун молиявий мукофот тизими ишга туширилди. Лойиҳа шу ойдан бошланган. Бу ҳақда The Guardian нашри ёзмоқда.
Дастур доирасида фойдаланувчилар махсус давлат платформасида ўқиш сессияларини қайд этиб боради. 15 дақиқа ёки ундан кўпроқ китоб ўқиган одамга 20 виртуал танга берилади. 1000 та танга тўплаган иштирокчи 1 Сингапур доллари олади. Бир кунда фақат битта ўқиш сессиясини ҳисобга олиш мумкин.
Шундай қилиб, 1 доллар олиш учун фойдаланувчи 50 кун давомида ҳар куни 15 дақиқадан китоб ўқиши керак.
Сингапур Миллий кутубхона кенгаши раҳбари Мелисса Тамнинг таъкидлашича, барқарор китоб ўқиш одатини шакллантириш кичик ва мунтазам қадамлардан бошланади.
Унинг сўзларига кўра, одамлар ҳозир исталган пайтда юзлаб сарлавҳаларни кўриши, видео томоша қилиши ёки турли маълумотларнинг қисқа хулосасини олиши мумкин. Шу сабабли лойиҳа китоб ўқиш учун кунига атиги 15 дақиқалик оддий мақсаддан бошланган.
Сингапур ҳукумати ёшлар учун ижтимоий тармоқларнинг зарарли таъсирини камайтириш чораларини ҳам кўриб чиқмоқда. Улар орасида ижтимоий тармоқлардан кунлик фойдаланиш вақтини чеклаш таклифи ҳам бор.
Шу билан бирга, Сингапурнинг 15 ёшли ўқувчилари 2025 йилги PISA тадқиқотида китоб ўқиш бўйича дунёда юқори натижа қайд этган.
Комментарии