Аввалроқ Тошкентдаги Глинка кўчасида йўлнинг чўкишига ер остидаги газ қувуридан газ сизиб чиқиши натижасида юзага келган чақнаш сабаб бўлгани ҳақида хабар берган эдик.
Тошкент шаҳар ҳокимлиги матбуот хизматига кўра, бундай ҳолатларнинг такрорланишининг олдини олиш мақсадида шаҳар маъмурияти топшириғи билан махсус ишчи гуруҳ тузилган. Унинг таркибига «Veolia Energy Tashkent» ИП МЧЖ, «Тошкент шаҳар сув таъминоти» МЧЖ, «Ҳудудгаз пойтахт» газ таъминоти филиали ҳамда туман газ таъминоти бўлимларининг тажрибали мутахассислари киритилган. Ишларга зарур махсус техника ҳам жалб этилган.
Айни пайтга қадар мутахассислар ўрта босимли газ қувурларида 4 та, паст босимли газ қувурларида эса 6 та газ сизиб чиқиши ҳолатини аниқлаган.
«Барча носозликлар бартараф этилди. Глинка кўчасидаги таъмирлаш-тиклаш ишлари якунланди ва йўл автотранспорт ҳаракати учун тўлиқ очилди», — дейилади хабарда.
Шунингдек, «Ҳудудгазтаъминот» АЖ ва бошқа масъул ташкилотларнинг кўчма лабораториялари томонидан Глинка кўчасига туташ ҳудудларда муҳандислик тармоқлари комплекс текширилиб, эҳтимолий газ сизиб чиқиш ҳолатлари аниқланмоқда.
Комментарии