Бухоро вилоятида илк бор замонавий метеозонд ўрнатилган аэрологик шар муваффақиятли учирилди, деб хабар бермоқда Миллий экология қўмитаси матбуот хизмати.
Қайд этилишича, учириш маҳаллий гидрометеорология хизматини ривожлантириш ва атмосфера ҳолатини ўрганиш имкониятларини кенгайтиришда муҳим қадам бўлди.
Аэрологик шарга ўрнатилган метеозонд турли баландликларга кўтарилиш вақтида реал вақт режимида асосий метеорологик параметрларни ўлчаб, ер усти қабул қилиш станциясига узатади. Ҳаво ҳарорати ва намлиги, атмосфера босими, шамол тезлиги ва йўналиши шулар жумласидандир.
Олинган маълумотлар мутахассисларга турли баландликлардаги атмосфера ҳолатини таҳлил қилиш ва бу маълумотлардан синоптик таҳлил ўтказишда фойдаланиш имконини беради.
"Об-ҳаво прогнозларининг аниқлигини ошириш ва хавфли гидрометеорологик ҳодисаларни эрта аниқлаш учун аэрологик кузатувлар алоҳида аҳамиятга эга. Бундан ташқари, атмосфера ҳолати тўғрисидаги ишончли маълумотлар авиация, қишлоқ хўжалиги, транспорт ва иқтисодиётнинг бошқа муҳим тармоқларини метеорологик маълумотлар билан таъминлаш учун зарур," - дейилади хабарда.
Аэрологик кузатувларнинг ривожланиши янада аниқ ва тезкор метеорологик маълумотларни шакллантиришга ёрдам бериши кутилмоқда, бу айниқса ўзгарувчан иқлим ва хавфли об-ҳаво ҳодисалари кўпайиши шароитида муҳимдир.
Комментарии