Ўзбекистоннинг Қозон шаҳридаги Бош консулхонаси хабарига кўра, 6 август куни Мордовия Республикасининг Лямбир тумани, Блохино қишлоғи яқинидаги М-5 «Урал» автомагистралининг 180-километрида «МАЗ» русумли юк автомашинаси билан Ўзбекистон давлат рақамидаги Chevrolet Spark енгил автомобили иштирокида йўл-транспорт ҳодисаси содир бўлган.
Фожиа оқибатида Ўзбекистоннинг икки нафар фуқароси — 1996 йилда туғилган А.А.П. ва 1997 йилда туғилган Б.Ш.А. вафот этган.
Шунингдек, яна уч нафар Ўзбекистон фуқароси — 2002 йилда туғилган А.Р.П., 1989 йилда туғилган Б.М.А. ва 2006 йилда туғилган А.М.П. турли даражада тан жароҳатлари олиб, Мордовия Марказий клиник шифохонасига ётқизилган.
Бош консулхона маълумотига кўра, мазкур ҳолат назоратга олинган. Маҳаллий ваколатли идоралар билан ҳамкорликда вафот этган фуқароларнинг жасадларини суд-тиббий экспертизаси ва бошқа расмий жараёнлар тугагач, Ватанга қайтариш ишлари Ўзбекистон Миграция агентлиги томонидан амалга оширилади.
Шунингдек, жароҳатланган фуқароларга зарур тиббий ёрдам кўрсатилгани ва улар шифохонадан жавоб берилгани маълум қилинди.
Комментарии