Тошкент вилояти Чиноз тумани ҳокимлиги матбуот хизматининг маълум қилишича, туман ҳокими Шерзод Солихов йиғилиш ўтказиб, унда «Бирлик» маҳалласида амалга оширилган ишлар натижалари танқидий руҳда кўриб чиқилди.
Йиғилишда ҳоким қайд этишича, вилоят ҳокимининг топшириғига кўра, йўл бўйида жойлашган «Бирлик» маҳалласи таянч маҳалла сифатида танланган. Бироқ ўрганишлар давомида маҳаллада гуллар ва райҳон экилмагани, ўтлар ўрилмагани ҳамда ўрилган ўтлар йиғиштирилмагани аниқланган.
Шунингдек, ободонлаштириш ишлари, санитария ҳолати, фуқаролар мурожаатларини кўриб чиқиш ҳамда берилган топшириқлар ижроси қониқарсиз деб топилди. Масъул шахслар фаолияти кескин танқид қилинди.
Шундан сўнг туман ҳокими рамзий тарзда «Бирлик» маҳалласини «Уят маҳалласи» деб эълон қилди ва бу ҳақдаги ёзув туширилган лавҳани кўринарли жойга ўрнатишни топширди. Шунингдек, маҳаллаларга бириктирилган корхона ва ташкилотлар раҳбарларига ҳудудлар ҳолатини шахсан назорат қилиш, ободонлаштириш ишларини жадаллаштириш ҳамда бажарилган ишлар бўйича фотоҳисобот тақдим этиш вазифаси юклатилди.
Йиғилиш якунида кўпчиликнинг фикри ва берилган баҳолар асосида “Бирлик” маҳалласи рамзий маънода “Шармандали маҳалла” деб эътироф этилди. Маҳалладаги мавжуд камчиликларни қисқа муддатда бартараф этиш, ишлар самарадорлигини ошириш ҳамда белгиланган топшириқлар ижросини таъминлаш юзасидан масъулларга қатъий вазифалар юклатилди.
Таъкидланганидек, ҳар бир раҳбар ўзига юклатилган масъулиятни чуқур ҳис этиб, аҳоли манфаатига хизмат қиладиган амалий натижаларни таъминлаши лозим.
Йиғилиш якунида масъулларга аниқланган камчиликларни қисқа муддатларда бартараф этиш, иш самарадорлигини ошириш ҳамда берилган топшириқлар ижросини таъминлаш бўйича вазифалар белгиланди.
Комментарии