Интерполнинг Ўзбекистон ва Молдова Миллий марказий бюролари ҳамкорлигида ўтказилган мувофиқлаштирилган тезкор тадбирлар натижасида фирибгарлик содир этганликда гумон қилиниб, халқаро қидирувга берилган Ўзбекистон фуқароси Кишинёв шаҳридан экстрадиция қилинди.
Маълум қилинишича, ушбу шахсга нисбатан халқаро қидирув Ўзбекистон Интерпол Миллий марказий бюроси томонидан Интерпол каналлари орқали эълон қилинган.
Қидирувдаги шахснинг жойлашувини аниқлаш ва уни қўлга олиш мақсадида Ўзбекистон ва Молдова Интерпол миллий марказий бюролари ўртасида доимий ахборот алмашинуви ҳамда ҳамкорликдаги тезкор ҳаракатлар йўлга қўйилган.
Тезкор-қидирув тадбирлари давомида қидирувдаги шахснинг манзили аниқланиб, у Молдова ҳудудида қўлга олинган.
Зарур экстрадиция жараёнлари якунлангач, у жиноий жавобгарликка тортиш учун Ўзбекистоннинг ваколатли органларига топширилди.
Комментарии