“Тошшаҳартрансхизмат” АЖнинг тасарруфидаги барча автобуслар, "Тошавтотаъмирхизмат" УК сервис хизмати ходимлари томонидан автобус ҳайдовчилари бошқарув вақтида тезликни оширмасликлари учун махсус дастур орқали тезликлари 50 км/ соат билан чегараланмоқда. Бу ҳақда “Тошшаҳартрансхизмат” АЖ Ахборот хизмати хабар қилди.
Қайд этилишича, бу дастур қўлланилгач автобуслар тезлиги 50 км/ соатдан ошмайди. Ҳар бир автобуснинг олд ойнасига огоҳлантирувчи белгилар ёпиштирилади.
"Мазкур ишлар йўловчилар хавфсизлигини таъминлаш ва йўлларда содир бўлиши мумкин бўлган фавқулодда ҳолатларни олдини олиш мақсадида қилинмоқда", - дейди “Тошшаҳартрансхизмат” АЖ ходими.
