Сурхондарёдаги мактаб ётоқхонасида ётувчи ўқувчилар овқатдан заҳарланиш аломатлари билан шифохонага ётқизилгани ҳақида хабар қилган эдик.
Ҳолат юзасидан Болалар омбудсмани расмий муносабат билдирди.
Маълум қилинишича, Сариосиё тумани ихтисослаштирилган мактаб интернатга аутсорсинг хизмати кўрсатган хусусий корхона томонидан истеъмолга яроқсиз бўлган маҳсулотлардан сифатсиз озиқ-овқат тайёрланиши оқибатида 33 нафар ўқувчи “Ўткир гастрит” аломатлари билан туман тиббиёт бирлашмасига мурожаат қилган.
Ушбу ҳолат тезкор-тергов гуруҳи томонидан ўрганилган. Натижада мактаб ошхонасидан олинган айрим маҳсулотлар санитария меъёрлари қоидалари ва гигиена нормалари талабларига жавоб бермаслиги ҳамда ошхона жиҳозларидан фойдаланиш тартиб қоидаларига риоя қилинмаганлиги, бу эса болалар ўртасида юқумли ошқозон ичак касалликлари билан касалланишига олиб келганлиги аниқланган.
Мазкур ҳолат юзасидан Сариосиё туман прокуратураси томонидан ЖКнинг 186-моддаси 4-қисми «б» банди билан жиноят иши қўзғатилди. Ҳозирда дастлабки тергов ҳаракатлари олиб борилмоқда.
