2027 йил 1 январдан Ўзбекистонда ўзини ўзи банд қилганлар учун ижтимоий солиқни мажбурий қилиш таклиф этилмоқда. Ҳозирда ўзини ўзи банд қилган шахслар ушбу солиқни ихтиёрий равишда йилига 1 БҲМ — 440 минг сўм миқдорида тўлайди.
Тизим ўзини ўзи банд қилган шахсларнинг келгусида пенсия таъминотини таъминлаш ва уларнинг давлат ижтимоий суғуртасидан фойдаланиш имкониятини кафолатлаш мақсадида жорий этилиши режалаштирилмоқда.
Шу билан бирга, уларга ижтимоий солиқни йил давомида қисмларга бўлиб тўлаш ҳуқуқини бериш таклиф этилмоқда. Бу ойига тахминан 36 минг сўмни ташкил этади.
Ўзини ўзи банд қилган шахслар томонидан тўланган ижтимоий солиқнинг 10 фоизи Давлат ижтимоий суғурта жамғармасига йўналтирилади.
Иқтисодиёт ва молия вазирлигида тушунтирилишича, бунинг эвазига фуқаро бир йиллик меҳнат стажига эга бўлади, келгусида пенсия олиш кафолатига, шунингдек, вақтинча меҳнатга қобилиятсизлик, ҳомиладорлик ва туғиш нафақаларини олиш ҳуқуқига эга бўлади.
Бундан ташқари, расмий даромадга эга фуқароларга ишламайдиган оила аъзолари учун ихтиёрий равишда ижтимоий солиқ тўлаш ҳуқуқини бериш таклиф қилинмоқда. Бу орқали уларнинг меҳнат стажи ва келгусида пенсия олиш ҳуқуқи шакллантирилади.
Лойиҳа муҳокамаси 30 сентябрга қадар давом этади.
Комментарии