Ўзбекистон президенти Шавкат Мирзиёев АҚШ президенти Дональд Трампга Вашингтондаги паркка ўрнатиш учун анъанавий ўзбек услубидаги икки айвонни совға қилди. Бу ҳақда The New York Times нашри хабар берди.
Айвонлар Вашингтондаги Ғарбий Потомак паркида ўрнатилади. Бу ҳудудда Трамп ташаббуси билан Америка қаҳрамонлари миллий боғини ташкил этиш режалаштирилган.
АҚШ Ички ишлар вазирлиги коммуникациялар бўйича директори Кэти Мартиннинг айтишича, президент Мирзиёев ўзбекларнинг анъанавий айвонларини Трампга АҚШ халқи номидан қабул қилиш учун совға қилган. Улар куз охирига қадар паркка ўрнатилиши кутилмоқда.
Ўзбекистоннинг АҚШдаги элчиси Фурқат Сидиқов ҳам совға ҳақида маълумот бериб, ўзбек санъати Вашингтондаги Миллий қаҳрамонлар боғининг бир қисмига айланишидан фахрланишини таъкидлади.
«Икки анъанавий ўзбек айвони — Ўзбекистон президентининг АҚШ президенти ва Америка халқига совғаси — дўстлигимиз ва стратегик шериклигимизнинг рамзи бўлади», — деб ёзди элчи.
Трамп режалаштираётган лойиҳа доирасида паркда ҳовузлар, умумий овқатланиш масканлари, амфитеатр ва машҳур америкаликларнинг 250 та реал ўлчамдаги ҳайкали ўрнатилиши режалаштирилган.
Комментарии