21 август куни Тошкентда ўтган баҳс 0:0 ҳисобида якунланган. Учрашувнинг қўшимча вақтида «Пахтакор» футболчилари гол урган, аммо VAR текширувидан сўнг гол бекор қилинган.
Ўйиндан кейин «Пахтакор» ҳакамлар бригадаси ишидан норозилигини билдириб, расмий шикоят берди. Клубнинг таъкидлашича, бош ҳакам баҳсли вазиятни мониторда мустақил кўриб чиқиши керак бўлган. «Пахтакор» шунингдек, VAR ҳакамлари ўртасидаги мулоқот аудиосини очиқлашни сўраган.
Масалани Ўзбекистон футбол ҳакамлари марказининг экспертлар гуруҳи кўриб чиқди. Мутахассислар хулосасига кўра, VAR ҳаками Равшан Абдувоҳидов протокол талабларини бузган ва бош ҳакамни вазиятни мониторда мустақил кўриб чиқишга чақирмаган.
Натижада бош ҳакам голни эпизодни шахсан қайта кўриб чиқмасдан, VAR ҳаками тақдим этган маълумот асосида бекор қилган.
Шу сабабли Равшан Абдувоҳидов VAR ҳаками сифатида жорий мавсум охиригача ишлашдан четлатилди.
Экспертлар хулосасида эса гол аслида ҳисобга олиниши керак ёки йўқлигига алоҳида баҳо берилмаган. Қайд этилган асосий қоидабузарлик — VAR протоколининг бузилганидир.
«Пахтакор» «Сурхон» билан дурангдан сўнг 39 очко жамғарган ва Суперлига жадвалида 2-ўринда бормоқда. Пешқадам «Нефтчи» ҳисобида 42 очко бор.
Комментарии