Аввалроқ биз Mega Logistics Service МЧЖ мансабдор шахслари аҳолини кўчириш бўйича ижро ҳаракатлари ҳали якунланмаганига қарамай, турар-жой уйини бузиб ташлагани ҳақида ёзган эдик. Ушбу ҳолат юзасидан Тошкент шаҳар прокуратураси қурилиш компанияси мансабдор шахсларига нисбатан жиноят иши қўзғатган.
Яккасарой туманидаги Mega Logistics Service МЧЖ объекти қурилишидаги қонунбузарликларга назорат органлари гўёки муносабат билдирмаётгани ҳақида ижтимоий тармоқларда хабарлар тарқалганидан сўнг, Қурилиш ва уй-жой коммунал хўжалиги соҳасида назорат инспекцияси ўтказилган текширув натижалари ҳақида маълум қилди.
Текширув давомида объект ҳудудида қурилиш-монтаж ишлари тўққизта блокда олиб борилаётгани аниқланган. Шулардан фақат учтаси Архитектура ва шаҳарсозлик кенгашининг ижобий хулосаси ҳамда давлат экспертизаси хулосаси каби барча зарур рухсат берувчи ҳужжатларга эга бўлган. Ушбу объектлар белгиланган тартибда рўйхатдан ўтказилганидан кейин уларда қурилиш ишларини бошлашга рухсат берилган.
Шу билан бирга, қолган олтита блокда қурилиш ишлари Инспекцияда мажбурий рўйхатдан ўтказилмасдан амалга оширилган, бу эса белгиланган тартибнинг бузилиши ҳисобланади.
Буюртмачи — Mega Logistics Service МЧЖга қонунбузарликларни бартараф этиш ва қурилишни қонунчилик талабларига мувофиқ расмийлаштириш тўғрисида бир неча бор бажарилиши мажбурий бўлган кўрсатмалар берилган. Бироқ ушбу талаблар бажарилмаган.
Натижада компаниянинг мансабдор шахслари маъмурий жавобгарликка тортилган. Шунингдек, буюртмачи томонидан техник назоратни амалга оширган мутахассисга нисбатан ҳам таъсир чоралари кўрилган.
Инспекция томонидан тўпланган материаллар ҳуқуқий баҳо бериш учун ҳуқуқни муҳофаза қилувчи органларга юборилган.
Комментарии