Олий Мажлис Қонунчилик палатасининг навбатдаги мажлисида фуқароларнинг қурилиши якунланмаган уйларда яшашининг олдини олишга қаратилган қонун лойиҳаси кўриб чиқилди.
Таъкидланишича, сўнгги вақтларда қурилиши тўлиқ якунланмаган ва фойдаланишга қабул қилинмаган кўп қаватли уйларда фуқаролар яшаши билан боғлиқ ҳолатлар кўпайган.
Депутатлар фуқаролар хавфсизлигини таъминлаш, шунингдек, мазкур соҳада фаолият юритувчи субъектларнинг масъулиятини оширишга қаратилган профилактик чораларни кучайтириш зарурлигини қайд этди.
Қонун лойиҳасига кўра, Жиноят кодексига кўп қаватли уйлар учун масъул қурилиш ташкилотлари ва мансабдор шахсларни фойдаланишга қабул қилинмаган уйларга аҳолини кўчиришга йўл қўйгани учун тўғридан-тўғри жиноий жавобгарликка тортишни назарда тутувчи норма киритилиши таклиф этилмоқда.
Шунингдек, Шаҳарсозлик кодексига буюртмачилар ва пудратчиларни бундай уйларга аҳолининг кўчиб киришига йўл қўймаслик чораларини кўришга мажбурловчи нормаларни киритиш ҳам режалаштирилган.
Комментарии