Аввалроқ, ижтимоий тармоқларда Ўзбекистон ва Португалия терма жамоаларининг ўйинини томоша қилиш учун ташкил этилган Бунёдкор стадионидаги фан-зонада тартибсизлик юзага келгани акс этган видео тарқалди. Пойтахт ИИББ ҳодиса юзасидан маълумот берди.
Қайд этилишича, фан-зонада белгиланган жойлар тўлганлиги ва бўш ўринлар қолмаганлиги муносабати билан, соат тахминан 21:00 ларда стадионга кириш тўхтатилиб, ташриф буюрган фуқароларга бошқа туманлардаги фан-зоналарга бориш тавсия этилган.
Бу борада айрим фуқаролар норозилик билдириб, ўрнатилган тартибга зид равишда стадионга киришга ҳаракат қилишган.
"Стадионда аҳоли хавфсизлигини таъминлаш учун жалб этилган ИИО ва МГ шахсий таркиби томонидан тезкорлик билан жамоат тартиби тикланган. Тартибни бузишга ҳаракат қилган фуқаролар билан профилактик суҳбат ўтказилиб, уларнинг барчаси расмий огоҳлантирилганлар.
Ҳурматли фуқаролар, Ўзбекистон терма жамоасининг футбол ўйинларини хотиржамликда томоша қилиш учун пойтахтимизда ҳамда мамлакатимизнинг барча ҳудудларида фан-зоналар ташкил этилган бўлиб, уларда аҳоли хавфсизлиги ишончли таъминланган. Ҳар қандай ҳуқуқбузарлик ёки жамоат тартибини бузишга бўлган ҳаракат қатъий чекланади", - дейилади хабарда.
Комментарии