18 ёшли йигит маст ҳолда автомобиль бошқариб ЙТҲ содир этди. 19 ёшли йўловчи йигит қурбон бўлди.
Ички ишлар вазирлиги ЙҲХББ Ахборот хизматининг маълум қилишича, жорий йилнинг 20 август куни соат 23:00 ларда, Тошкент шаҳар, Яккасарой тумани Ш.Руставелли кўчасида ҳайдовчи 2002 й.т. Ш.А. Lacetti русумли транспорт воситасида маст ҳолда ҳаракатланаётиб, рул бошқарувини йўқотган ва йўлни ажратувчи бўлагида ёритиш чироқлари ўрнатилган темир симёғочга урилган.
Натижада, ушбу автомобиль йўловчиси 19 ёшли И.Ш. оғир тан жароҳатлари олиб воқеа жойида вафот этган. Автомобиль ҳайдовчиси 18 ёшли Ш.А. ва йўловчиси 19 ёшли Қ.К. тан жароҳатлари билан шифохонага ётқизилган.
Мазкур ЙТҲ юзасидан Яккасарой тумани ИИО ФМБ ТБ томонидан дастлабки тергов ҳаракатлари олиб борилмоқда.
ИИВ ЙҲХББ ҳайдовчилардан маст ҳолатида транспорт воситасини бошқармасликларини, ўзи ва ўзгалар ҳаётини хавф остига қўймасликларини сўрайди.
